دانشجویان فیزیک دانشگاه محقق اردبیلی
برای استفاده بهتر از امکانات سایت از مرورگرهای Chrome یا Firefox استفاده کنید.
آی کیشی بیلمم نه اولوپدور سنه
دردینی گیزلتمه بیان ائت منه
صوبح چاغی شادو خرامانیدون
آی نه گوزل سئوملی انسانیدون
بال کیمی شیرینیدی هر بیر سوزون
بنده یه باخدقجا گولردی گوزون
هر سوزه اولموشدی جوابون جانا
لبلرون اوخشوردی گل خندانا
محسنه گاهی بویوروردون بالا
حقّ گوروم چینووه خلعت سالا
یاخجی آغارتدین آتانین صورتین
حفظ ائلدین حورمتین حیثیتین
قویمادین آرزیم اوخی دیسین داشا
نمره لرون عالی دی باشدان باشا
هوشدا فراصتده چکیب سن منه
سن منه فخر ائیله اوغول من سنه
آی کیمی شاد ائتدی منی گولمگون
مین دیلینن قیزلاری دیندیرمگون
صبح بو ائو خانه ی احسانیدی
حاتم طائی بیزه مهمانیدی
گاه بیچردون کت و دامن منه
گاه تیکردون تزه دون سوسنه
عالمه یه تای تای آلیردون پفک
مهدی یه یخدان دولوسی نوش مک
صبح چاغی آیری بیر انسانیدون
جسمیمه جان دردیمه درمانیدون
ایندی نه اولموش قیزاریب گوزلرون
زهر هلاهل کیمی دور سوزلرون
قاش قاباغون عین بولود ساللانیب
بالتا دییب قول بوداغین داللانیب
نور نومودوندان اوره گیم یاره دی
صور صوفتون قابل کفاره دی
چهره ون اولوب لب لبینین پشمیشی
دیل دگون آغزوندا ایلاندیر کیشی
گوزدن آخیتما بو قدر آب غورا
بورنووی اوخشاتما باری شیپورا
اوت غضبینقورخور اوشاخلار کیشی
اوز وئریرم ایستمه آستار کیشی
بسدیر آی آرواد منی چوخ دانلاما
وقته قالیر آغزینی یوم بانلاما
صورصوفتیم , نور نورمودوم هرنه دیر
سن کیمی جیرانه برازنده دیر
من دئدیگون , سن بویور آیا نه سن
اللی یاشین وار هله ده کورپسه سن
گورمیوب عمرومده اوطی شالواریم
آمما دیلون اولچوده ارشین یاریم
آرواد اودور غم گونی غمخوار اولا
اوز ارینه یاخجی مددکار اولا
ساخلاسا آرواد اگر اوز حورمتین
ارده اونون فرض بیلر عزّتین
چوخدا زنن سن آدین اولماز رشید
هرزه سوزون مرزه جوابین ائشید
دوزدی سحر شاد و خرامانیدیم
سیز بینن سئوملی انسانیدیم
مدرسه ده دگدی قاپاز باشیمه
قاتدی سویی ایستی اولان آشیمه
قاش قاباغیم بیله اگر ساللانیب
قول بوداغیم مدرسه ده داللانیب
گئتمیشیدیم محسنی یازدرماقا
بنده نی حالی ائله دی بیر آقا
چون بو اوشاق نمره ده ممتازدی
کان ادب صاحب اعجازدی
اولگی اولوب جمله محصللره
مشتری ییک بیزده بوجور گوللره
هامبی دان آرتیق بیز اوچون ارجی وار
آمما بئش اون تاختا سیزه خرجی وار
تاختا نه دیر , خرج نه دیر آی آقا
لطف ائله بیر ذره سوزی خیردالا
بنده نی عفو ائیله بیر آز ساده یم
توت الیمی فکر ائله افتاده یم
باخدی آی آرواد ائله بوز بوز منه
سانکی نوکر اربابا وورموش تنه
باشیمه قیشقیردی او صاحب سخن
بیله دئدی تاختا اولار مین تومن
مدرسه میز مردمی دور آی حاجی
چوپله پولی باخما منه قیقاجی
هر نه جیبیمده واریدی آلدیلار
طعنه لرین پیسریمه چالدیلار
شرمیله ذکر ائیلیرم آرواد سنه
قیرمیزی چک کتیلان دامنه
درس اوخیان چونکه چاتیر عزّته
گئت گوزلیم سنده یازیل نهضته
سوزلر ائشیتدیم او دبستانیده
مثلی اولانماز چالامیدانیده
محضرینه عرض ائدیرم الغرض
سوز چوخ اوزانسا اولاجاقدیر مرض
ایندی کی اولاد وطن پخته دی
مین تومنین بیر آدی دا تخته دی
اردبیل 12/05/1374
گرچه حد صبردن چوخ اولدی هجران اردبیل
حمد اولا آللاهه دردین تاپدی درمان اردبیل
ای شهادت شهری , شعرین قایناقی ارشاد ائوی
ای فضا سیندن ساچان افلاکه عرفان اردبیل
ای وئرن زینت حسین آدیله کوی و برزنه
ای تجلّی ائیلین آلنیندا ایمان اردبیل
ای گوزی گریان , اووزی خندان , سوزی بالدان شیرین
کئچمیشیندن داغلی چون شمع شبستان اردبیل
ای وئرن اطفاله درس استقامت داغ کیمین
ای بئجردن دامنینده مینلر اصلان اردبیل
دامن پاکینده هر بیر مرد اوغول چاتمش بویا
اولموش حد و مرز ایرانه نگهبان اردبیل
ائلرون هئچ بیر زماندا اوومئیوب اغیاردن
ای جفای یاردن گریان و نالان اردبیل
خور باخاندا دینیمه , تورپاقیمه بیگانه لر
قهرمانلار ائتموسن قربان جانان اردبیل
سن مقدسی یوردی سان شیخ صفی نین موطنی
سن دیانت ملکونون جسمینده سن جان اردبیل
السا مین جانیم بیرین حاشا وئرم بیگانه یه
بیر جانم اولسا اودا ایرانه قربان اردبیل
سن تشیع مهدی , صاحب عصریلن هم عهدسن
تکیه گاهوندور سنین مهدی دوران اردبیل
حقّی وئرمیش صاحبان حقّه حق مخلصلری
پارلاسین سینه نده تا عنوان استان ادربیل
کیم سنی آماله چاتدیرمیش وار اولسون اللری
شامل اولسون حالینه الطاف یزدان اردبیل
پای لنگان دور اگر وصفونده طبعیم توسنی
نقص مندندیر تاپلماز سنده نقصان اردبیل
هم صداقت ملکونه صورت نما آئینه سن
هم بلاغت باغینا خورشید رخشان اردبیل
سن ایگیدلر یوردی سان وورغون کونوللر مسکنی
خون غیرتدور او شریانونده کی قان اردبیل
یایدا مینلر مهمانین ذهنینین تصویری سن
بوته ی نسیانداسان فصل زمستان اردبیل
جنت الاعلادی یازدا داغ داشون مهمانلارا
قار بوراندا بیر اوزون سن بیرده سبحان اردبیل
باغلانیپدیر تئل به تئل کونلوم پریشان زولفینه
عاصمه رضوان دی سنلن اولسا نیران اردبیل